Sarandë – Një aksident rrugor është regjistruar pasditen e sotme në lagjen nr. 4 të qytetit bregdetar, pranë stadiumit të Sarandës, duke shkaktuar panik dhe bllokim të përkohshëm të qarkullimit.

Sipas të dhënave paraprake, një automjet në lëvizje ka humbur kontrollin dhe është përplasur fillimisht me disa mjete të parkuara, si dhe me disa automjete të tjera që ndodheshin në lëvizje. Pas përplasjeve të njëpasnjëshme, automjeti është përmbysur në rrugë, duke krijuar një skenë dramatike në mes të qytetit.

Fatmirësisht, nga aksidenti nuk raportohet për të lënduar në njerëz. Megjithatë, dëmet materiale janë të konsiderueshme, si në automjetin që shkaktoi aksidentin, ashtu edhe në mjetet e tjera të dëmtuara.

Forcat e Policisë mbërritën menjëherë në vendin e ngjarjes dhe kryen këqyrjen e parë të skenës së aksidentit. Grupi hetimor po punon për të përcaktuar rrethanat e aksidentit dhe shkaqet që çuan drejtuesin e mjetit të humbasë kontrollin.

Ngjarja ka shqetësuar banorët e zonës, ndërsa për disa minuta është krijuar kaos në qarkullimin rrugor në segmentin pranë stadiumit.

Hetimet janë në vijim dhe pritet një deklaratë zyrtare për identitetin e drejtuesit të mjetit dhe nëse ka pasur shkelje të rregullave të qarkullimit.