Një aksident rrugor është regjistruar mbrëmjen e 15 korrikut në rrugën “Dhimitër Konomi”, në zonën e njohur si Palazinë, ku një automjet është përplasur me një biçikletë që drejtohej nga një shtetas amerikan.

Sipas informacioneve zyrtare, aksidenti ka ndodhur rreth orës 21:10 dhe ka përfshirë automjetin me targë AE840T, i drejtuar nga Adriatik Lame, 58 vjeç, si dhe shtetasin amerikan Alex Shower, rreth 30 vjeç, i cili ishte duke lëvizur me biçikletë.

Pas përplasjes, shtetasi amerikan është transportuar me urgjencë drejt Spitalit Rajonal të Vlorës, ku ka marrë ndihmën e nevojshme mjekësore. Burime spitalore konfirmojnë se ai ndodhet jashtë rrezikut për jetën dhe është larguar nga ambientet spitalore pas trajtimit.

Në vendngjarje kanë mbërritur menjëherë forcat e Policisë, të cilat kanë kryer veprimet procedurale për dokumentimin e aksidentit. Ndërkohë, testi i alkoolit për drejtuesin e automjetit ka rezultuar negativ, me vlerë 0.000 mg/l.

Rrethanat e aksidentit janë ende në hetim për të përcaktuar shkaktarët dhe përgjegjësitë për ngjarjen.