Një aksident i rëndë me pasojë një viktimë dhe tre të plagosur ka ndodhur mëngjesin e sotëm në aksin nacional Çermë–Divjakë.

Një automjet tip Volkswagen Passat, me katër persona në bord, ka humbur kontrollin teksa dilte nga rruga e fshatit Çermë-Sektor për në aksin kryesor dhe ka përfunduar në kanal. Përplasja ka rezultuar fatale për një nga pasagjeret, ndërsa tre të tjerë mbetën të plagosur rëndë.

Viktima është identifikuar si Majlinda Sula, 47 vjeçe, e cila humbi jetën nga plagët e marra. Në gjendje kritike ndodhen drejtuesi i mjetit Ferit Mekshi, 63 vjeç, Afërdita Mekshi, 37 vjeçe dhe djali i saj 15-vjeçar, të cilët po marrin trajtim mjekësor në spital.

Sipas banorëve të zonës, dalja nga rruga e Çermë-Sektorit drejt rrugës nacionale është një pikë e rrezikshme, ku edhe në të shkuarën janë shënuar aksidente me pasoja tragjike.

Policia po heton shkaqet e ngjarjes.