Një aksident tragjik ka ndodhur mbrëmjen e kësaj të shtune në dalje të Fushë-Krujës, në lagjen “Bakushe Visha”.

Mësohet se një 17-vjeçar i identifikuar si Isuf Mehmeti është përplasur për vdekje nga një automjet tip “Hyundai”, teksa kalonte rrugën nga një krah në tjetrin, fare pranë vizave të bardha.

Shoferi i automjetit, i identifikuar si Andi Kullaj, është arrestuar nga policia, e cila ndodhet në vendngjarje. “Rreth orës 21:30, në Fushë Krujë, automjeti me drejtues shtetasin A. K., ka aksidentuar me pasojë vdekjen një të mitur 17-vjeç. Shtetasi A. K. është shoqëruar në komisariat për veprime të mëtejshme, ndërsa grupi hetimor ndodhet në vendngjarje dhe po punon për sqarimin e rrethanave të aksidentit,” – njofton policia.

Paraprakisht dyshohet se shkak i aksidentit ka qenë shpejtësia e madhe me të cilën po lëvizte automjeti, duke kaluar normën e përcaktuar për qarkullimin në këtë zonë, ku ndodhet edhe një shkollë 9-vjeçare.

Për këtë arsye, makina ka marrë zvarrë të miturin për rreth 50 metra, duke bërë që viktimës t’i bien nga xhepat sendet personale, por edhe një këpucë nga këmba.