Ka kaluar një fundjavë shumë e dhimbshme dhe plot homazhe për Freddy Rincón, ish-futbollistin e Napolit dhe Real Madridit, ikonën e kombëtares kolumbiane, i cili u nda nga jeta. Megjithatë, rrethanat e sakta të vdekjes së tij janë ende duke u hetuar nga Prokuroria, pasi ka versione kontradiktore se kush ishte me të, kush e drejtonte kamionin dhe pse u larguan nga vendi i aksidentit.
Detaje dalin nga hetimet mbi aksidentin fatal automobilistik. Freddy Rincón e gjetën në sediljen e shoferit. I fundit që e takoi ishte edhe këngëtari Hárold Saa, mik i ngushtë i ish-futbollistit. Pikërisht me këtë person mundi t’i ndante orët e fundit Rincon para ngjarjes fatale.
Në një intervistë për “Blu Radio”, artisti ka dhënë disa detaje për atë që ka ndodhur mëngjesin e 11 prillit: “Ai ka qenë në shtëpi nga ora 12 e mesditës deri në orën 11 të natës, ka ardhur me vajza, të cilat nuk i njihja. Një nga vajzat i tha se i kishte premtuar se do të shkonin diku tjetër. Më ftoi dhe mua, por isha në zi”.
Saa konfirmoi se automjeti i përkiste Freddy Rincón dhe se ai u largua nga shtëpia e tij para se të bënte aksidentin: “Nuk e di nëse po e ngiste vetë makinën. Kamioni ishte i tij, i njëjti që më sillte gjithmonë këtu në shtëpinë time. Ishin dy vajza që erdhën, por ai thirri më shumë njerëz dhe u larguan”.
Për videon e një burri pranë kamionit që kërcënonte ata që regjistronin, Saa preferoi të mos fliste, sepse ishte objekt hetimi, por la të kuptohet se ish-futbollisti ishte në timon: “Unë besoj në një version, por nuk do ta them, sepse mund të futem në telashe. Mjekët që e sollën Fredin e dinë se ku ishte. Gjithçka është e qartë atje”.
Artisti rrëfen më tej bisedat e fundit: “Në katin e dytë ku jeton motra ime po bisedonim. Vajzat që mbërritën me të dhe motra ime po flisnin për vdekjen e mbesës sime (…) Freddy ishte aty, hëngri dhe më pas më tha lamtumirë. Më tha se do të shihemi më vonë (…)
‘Merre my hands’ nga Willie Colón ishte kënga e fundit që dëgjoi, sepse i pëlqeu shumë. Atë e këndojmë në majë të mushkërive (duke qarë)”, – përfundoi ai i përlotur në kujtim të mikut të tij.
