Një aksident tragjik me fatalitet ka ndodhur pasditen e sotme në autostradën “Ibrahim Rugova”, ku një person ka humbur jetën pas një vetëaksidenti me motoçikletë. Sipas burimeve të Gazetës Sinjali, bëhet fjalë për të riun Andi Murati nga Peja, i cili ishte i njohur ndër miq për pasionin e tij ndaj motoçikletave.

Murati, me profesion mjek, fatkeqësisht ka humbur jetën në këtë aksident. Lajmin për aksidentin e ka konfirmuar zëdhënësi i Policisë, Daut Hoxha, i cili tha se bëhej fjalë për një vetëaksident me motor.

“Me datë 13.10.2024, rreth orës 14:40, është pranuar informata se në Autostradën ‘Ibrahim Rugova’ Km-3, në drejtimin Prizren Jug-Vermicë, ka ndodhur një vetëaksident trafiku me motor,” deklaroi Hoxha.

Ai shtoi se njësitë policore për kontrollin e autostradës, përfshirë edhe njësinë e hetimeve, kanë dalë menjëherë në vendin e ngjarjes për të kryer procedurat e nevojshme hetimore. Mjekët kujdestarë konstatuan se viktima ishte pa shenja jete në vendngjarje.