Një aksion i befasishëm policor është zhvilluar këtë të mërkurë në Tiranë, ku një person është arrestuar pas një ndjekjeje që nisi në zonën e “Myslym Shyrit” dhe përfundoi pranë shkollës “Petro Nini Luarasi”.

Policia kishte marrë informacion paraprak se një automjet po qarkullonte me dyshime për mbajtje armësh zjarri. Gjatë ndjekjes, drejtuesi i automjetit u përpoq të largohej me shpejtësi, duke përplasur disa makina të parkuara, por fatmirësisht pa shkaktuar të lënduar.

Pas ndalimit të tij, policia bëri kontrollin e mjetit, ku gjeti një armë zjarri, çka konfirmoi dyshimet e para.

I arrestuari, identiteti i të cilit nuk është bërë ende publik, dyshohet se ka lidhje me Aleksandër Sadikajn, i cili u vra në vitin 2022 me eksploziv në autostradën Tiranë-Elbasan, në një atentat ende të pazbardhur plotësisht.

Hetimet janë në vijim, ndërsa policia po verifikon lidhjet dhe qëllimet e të ndaluarit, si dhe po heton nëse armët janë përdorur apo janë planifikuar për përdorim në ngjarje kriminale.