Kompania franceze hekurudhore SNCF ka njoftuar se rrjeti i saj i shpejtësisë së lartë është bërë shënjestër e “akteve dashakeqe” që synojnë paralizimin e sistemit, vetëm disa orë para ceremonisë së hapjes për Lojërat Olimpike të Parisit.

Sulmet kanë prekur disa linja hekurudhore TGV me shpejtësi të lartë në perëndim, veri dhe lindje të Parisit, duke krijuar radhë të gjata në stacionin ‘Gare Montparnasse’ në qytet. Disa trena janë anuluar dhe SNCF ka paralajmëruar se situata mund të zgjasë “të paktën gjatë gjithë fundjavës derisa të kryhen riparimet”.

“Natën e kaluar, SNCF ishte viktimë e disa akteve vandalizmi në linjat e shpejtësisë së lartë në Atlantik, Veri dhe Lindje. Zjarret ishin vënë qëllimisht për të dëmtuar instalimet tona,” thuhet në një deklaratë të kompanisë.

Në një postim në rrjetet sociale, Patrice Vergriete shkroi: “Veprimet dashakeqe të bashkërenduara shënjestruan disa linja TGV mbrëmë dhe do të ndërpresin qarkullimin deri në këtë fundjavë. Dënoj fuqishëm këto veprime kriminale që do të rrezikojnë largimet për pushime të shumë francezëve.”