Mumbai – Aktori i njohur i Bollywood-it, Saif Ali Khan, është sulmuar me thikë nga një hajdut që hyri në rezidencën e tij në Mumbai gjatë natës. Ngjarja e rëndë ndodhi rreth orës 2:30 të mëngjesit, në lagjen e pasur Bandra, ku jeton Khan me familjen e tij.

Sipas burimeve policore, aktori u përfshi në një përleshje me sulmuesin, i cili e goditi disa herë me thikë, duke i shkaktuar plagë të rënda, njëra prej të cilave pranë shtyllës kurrizore. Menjëherë pas incidentit, i biri i tij, Ibrahim Ali Khan, e dërgoi aktorin në spitalin Lilavati, ku iu nënshtrua një operacioni urgjent për të riparuar dëmtimet. Mjekët konfirmojnë se Khan është jashtë rrezikut për jetën dhe ndodhet në gjendje të stabilizuar.

Në momentin e sulmit, në shtëpi ndodheshin edhe bashkëshortja e tij, Kareena Kapoor Khan, dhe fëmijët e tyre, të cilët fatmirësisht nuk u lënduan. Policia po heton incidentin dhe ka ndaluar tre persona për t’i marrë në pyetje, mes tyre edhe individë që mund të kenë ndihmuar sulmuesin të hyjë brenda shtëpisë.

Lajmi ka tronditur komunitetin e Bollywood-it dhe fansat e Khan, të cilët po i urojnë atij një shërim të shpejtë. Familja e tij ende nuk ka bërë një deklaratë publike.