Aktorja e njohur, Juli Emiri, ka pësuar djegie së bashku me babain e saj si pasojë e shpërthimit të një bombe molotov gjatë tubimit të opozitës mbrëmjen e së hënës, më 7 Tetor, në kryeqytet. Sipas deklaratave të aktores, i ati i saj u përfshi nga flakët pasi një efektiv policie shtyu bombën molotov drejt turmës së protestuesve.

Aktorja ka treguar se, së bashku me protestues të tjerë, u përpoqën të shuanin flakët që kishin përfshirë trupin e babait të saj, por ajo vetë pësoi djegie. Ajo theksoi se zjarrin që kishte përfshirë babain e saj e shuan pas disa minutash, ndërsa akuzoi efektivët se “për asnjë çast nuk na hodhën ujin me të cilin shpërndanin protestuesit”.

“Babi mund të kishte vdekur sot,” shkruan aktorja në rrjetet sociale, duke publikuar një video ku tregon djegiet në trupin e të atit. Kjo ngjarje ka shkaktuar reagime të shumta në opinionin publik dhe ka nxitur diskutime mbi menaxhimin e situatave gjatë protestave.