Kreu i Kontrollit të Lartë të Shtetit (KLSH), Arben Shehu, ka zbuluar se në Shqipëri janë tregtuar akullore të kontaminuara me Oksid Etileni, një substancë e njohur për shkaktimin e kancerit, leucemisë dhe ndikimeve negative në aftësinë riprodhuese të meshkujve. Sipas Shehut, janë konsumuar 13.2 tonë akullore të kontaminuara në qytete të ndryshme të vendit, përfshirë Tiranën, Durrësin, Fierin, Elbasanin, Vlorën, Beratin, Lushnjen, Korçën, Shkodrën, Sarandën, Krujën, Burrelin, Peshkopinë, Tropojën dhe Lezhën.

Mjeku Ilir Alimehmeti, gjatë një emisioni televiziv, theksoi se është e vështirë të përcaktohet nëse konsumimi i këtyre akulloreve ka ndikuar në rritjen e rasteve të kancerit në vend. Megjithatë, ai vuri në dukje se kanceri më i zakonshëm te fëmijët, që janë konsumatorët kryesorë të akulloreve, është leucemia. Alimehmeti shtoi se efektet e Oksid Etilenit mund të shfaqen relativisht shpejt dhe se gjenetika e individëve luan një rol të rëndësishëm në reagimin ndaj substancave kimike.

“Leucemitë dhe limfomat janë të shpeshta në moshën pediatrike, këtu efekti mund të jetë më i shkurtër, por këtu është me mund se nuk mund ta vërtetosh. Por ekziston dyshimi i arsyeshëm që është një lëndë që vepron relativisht shpejt. Secili ka gjenetikë të ndryshme dhe gjenet tona reagojnë në mënyrë të ndryshme ndaj lëndëve të ndryshme kimike”, tha mjeku.