Presidenca e Bosnjë-Hercegovinës ka marrë një kërcënim serioz për vendosjen e një bombe në ambientet e saj, përmes një emaili që informonte për një mjet shpërthyes. Mesazhi, sipas mediave në Sarajevë, përmbante një paralajmërim, ku thuhej:

“Në administratën e presidentit të Bosnje-Hercegovinës u vendosën pajisje shpërthyese. Kjo është për qëndrimin tuaj të keq ndaj Federatës Ruse.”

Për momentin, autoritetet po reagojnë në përputhje me udhëzimet e Prokurorisë së Bosnjë-Hercegovinës. Zëdhënësja e Agjencisë së Hetimit dhe Mbrojtjes së Shtetit (SIPA), Jelena Miovçiç, deklaroi se po kryhet një kontroll i plotë për të siguruar që ambientet e Presidencës të jenë të sigurta. KDZ-ja (njësia për neutralizimin e pajisjeve shpërthyese) po kontrollon të tri zyrat e Presidencës për të verifikuar rrezikun e mundshëm.