Një studim i ri i kryer nga Instituti Robert Koch (RKI), në bashkëpunim me Universitetin e Uashingtonit dhe institucione të tjera kërkimore, ka nxjerrë në pah një kërcënim serioz shëndetësor në Gjermani: infeksionet rezistente ndaj antibiotikëve vazhdojnë të shkaktojnë dhjetëra mijëra viktima çdo vit.

Sipas analizës, e publikuar në revistën Journal of Antimicrobial Chemotherapy – Antimicrobial Resistance, vetëm në vitin 2019 rreth 45.700 persona në Gjermani humbën jetën për shkak të patogjenëve rezistentë ndaj antibiotikëve.

Në shumë raste, rezistenca nuk ishte shkaku i menjëhershëm i vdekjes, por infeksionet e gjakut, të rrugëve të frymëmarrjes dhe infeksionet abdominale ishin pasojë fatale. Studimi vlerëson se 9.600 vdekje mund të ishin shmangur nëse bakteret nuk do të kishin qenë rezistente.

Gjermania regjistroi 939.500 vdekje në total gjatë vitit 2019, çka do të thotë se rezistenca ndaj antibiotikëve përbën një pjesë të konsiderueshme të mortalitetit.

Instituti RKI paralajmëron se kjo është “një nga sfidat më të mëdha shëndetësore globale të kohës sonë”, duke theksuar se problemi nxitet nga:
• Përdorimi i tepruar i antibiotikëve
• Trajtimet e gjata dhe të panevojshme
• Përshkrimet jo të duhura nga mjekët

Këto faktorë krijojnë presion që nxit përhapjen e rezistencës bakteriale, duke e bërë trajtimin e infeksioneve gjithnjë e më të vështirë dhe duke rritur rrezikun për epidemi të ardhshme.