Strasburg – Deputetja e Partisë Demokratike, Albana Vokshi, ka ngritur akuza të forta ndaj autoriteteve shqiptare gjatë fjalës së saj në Asamblenë Parlamentare të Këshillit të Evropës, ku denoncoi ndikimin e krimit të organizuar në zgjedhjet parlamentare të 11 majit në Shqipëri.

Gjatë fjalës së saj, Vokshi deklaroi se është kërcënuar personalisht së bashku me vajzën e saj, nga persona të cilët – sipas saj – janë të dënuar për vrasje dhe trafik droge, dhe që ndodheshin në qendrat e votimit në Vorë ditën e zgjedhjeve.

“Në Vorë, u kërcënova në mes të ditës nga kriminelë të dënuar për vrasje dhe trafik droge. Vajza ime gjithashtu u kërcënua. Pavarësisht telefonatave Policisë së Shtetit dhe kallëzimeve zyrtare në SPAK, askush nuk veproi. Ata kriminelë janë ende të lirë, ndërsa unë druhem çdo ditë derisa fëmijët kthehen në shtëpi”, – u shpreh Vokshi.

Thirrje për reagim ndërkombëtar

Deputetja e opozitës bëri thirrje të drejtpërdrejtë ndaj deputetëve të Këshillit të Evropës, duke kërkuar reagim të menjëhershëm ndaj fakteve që sipas saj dëshmojnë kapjen e zgjedhjeve nga krimi.

Ajo i referoi Asamblesë një video të shkurtër, ku tha se “shihen qartë skenat se si u realizuan zgjedhjet e 11 majit në Shqipëri”.

Në fund të fjalës së saj, Vokshi i drejtoi një sërë pyetjesh përfaqësuesve ndërkombëtarë, duke theksuar se heshtja ndaj këtyre ngjarjeve rrezikon demokracinë në Shqipëri dhe legjitimitetin e procesit zgjedhor.

“Unë jam këtu jo vetëm si deputete, por si një nënë e shqetësuar për jetën e fëmijëve të mi dhe të gjithë atyre që kërkojnë të jetojnë në një vend demokratik. Mos heshtni përballë krimit që po cënon votën e lirë në vendin tim”, tha ajo.

Fjalimi i Vokshit ka marrë jehonë në mediat shqiptare dhe ndërkombëtare, ndërsa pritet në vijim reagimi zyrtar i autoriteteve shqiptare dhe i misioneve ndërkombëtare që monitoruan zgjedhjet.