Pas ndeshjes emocionuese mes Shqipërisë dhe Kroacisë që përfundoi me barazimin 2-2, Kryeministri i Kosovës, Albin Kurti, ka reaguar në rrjetet sociale duke përgëzuar ekipin shqiptar dhe duke theksuar rëndësinë e kësaj ndeshjeje.

Në postimin e tij, Kurti ka theksuar emocionet dhe entuziazmin që ekipi i Shqipërisë u ka dhuruar tifozëve:

“Ëndrra vazhdon! Atmosfera që nuk përsëritet me lojë të bukur futbolli,” është shprehur Kurti, duke vlerësuar veçanërisht performancën e pjesës së parë të ndeshjes nga ekipi shqiptar dhe vullnetin e tyre për të vazhduar përpara.

Kurti gjithashtu ka vënë në dukje se pjesa e parë ishte në favor të Shqipërisë, ndërsa pjesa e dytë i përkiste Kroacisë, dhe përfundimisht, të dyja ekipet ndanë nga një pikë secila. Ky rezultat, sipas tij, tregon për një ndeshje të luajtur me shpirt dhe me një atmosferë të papërsëritshme.

Reagimi i plotë i Kurtit:

“Çfarë Shqipërie që na mbush ndjenja dhe entuziazëm! Pjesa e parë ishte e jona. Pjesa e dytë e Kroacisë. Në fund u ndamë me nga një pikë secila. Atmosferë që nuk përsëritet me lojë të bukur futbolli.

Ëndrra vazhdon!”