Kryeministri i Kosovës, Albin Kurti, ka shprehur gëzimin e tij në Aeroportin Ndërkombëtar të Prishtinës “Adem Jashari”, ku ka uruar qytetarët e Kosovës për liberalizimin e vizave. Në një fjalim emocional, Kurti tha se kjo është heqja e një padrejtësie dhe qytetarët e Kosovës tani kanë mundësinë të udhëtojnë pa viza në 32 vende.

“Kemi pritur shumë gjatë, nga sot po hiqet një padrejtësi. Qytetarët tanë tashmë do të mund të lëvizin në 32 vende. Sot do të udhëtojnë për në Vjenë 50 qytetarë të cilët kanë fituar këtë mundësi në kuadër të fushatës tonë. Të respektojnë kriteret, dhe kudo që të udhëtojmë mos të harrojmë se shtëpia jonë është Kosova. Urime viti i ri dhe për herë të fundit urime liberalizimi i vizave”, deklaroi Kurti.

Grupi i parë i qytetarëve që udhëtojnë pa viza janë fituesit e kuizit të Bashkimit Evropian, që është organizuar në kuadër fushatës informuese të Qeverisë së Kosovës lidhur me liberalizimin e vizave.