Vlora ka edhe një arsye tjetër për t’u ndier krenare. Aleksandër Petoshati, një prej talenteve më premtues të sportit vlonjat, është shpallur Kampion Kombëtar në Kampionatin Kombëtar të Mundjes të zhvilluar në Tiranë.

I riu 19-vjeçar, që garoi në peshën 72 kilogramë, kategoria U-20, dominoi turneun me pesë fitore radhazi, duke siguruar vendin e parë dhe titullin e “Mundësit më të Mirë të Kampionatit”.

Petoshati stërvitet me ekipin Vlora Wrestling dhe është gjithashtu pjesë e të rinjve të Flamurtarit. Me këtë sukses, ai numëron tashmë 10 tituj kampioni në karrierën e tij të re, duke dëshmuar përkushtim, disiplinë dhe pasion të rrallë për sportin.

Ky rezultat i rëndësishëm vjen në një moment kur Vlora po planifikon ndërtimin e një Muzeu të Mundjes, një projekt që synon të ruajë dhe promovojë traditën e pasur të këtij sporti në qytetin bregdetar dhe të nderojë kampionët që kanë lartësuar emrin e tij ndër vite.

Me suksesin e Aleksandër Petoshatit, mundja vlonjate tregon edhe një herë se mbetet një nga sportet më të lavdishme dhe më të dashura për qytetin e Vlorës.