Pas përfundimit të mbledhjes së kryesisë së PD, kryetari i komanduar i demokratëve, Enkelejd Alibeaj ka dhënë një deklaratë për mediat.

Ai tha se nëpërmjet pikave të publikuara më herët, qëndrimi i kryesisë ishte i qartë ku kërkohej zyrtarisht bashkimi me pjesën tjetër të deputetëve “kritikë”. Ndërsa u shpreh se ai si kryetar i komanduar i PD do të përcaktonte emrat të cilët do të ishin pjesë e komisionit për bashkimin e partisë.

Alibeaj shmangu pyetjen nëse ishte tërhequr nga kushti i vendosur që ish kryeministri Sali Berisha të mos kandidonte për postin e kryetarit duke thënë se çdo gjë ishte thënë shumë qartë më parë.

Kryetari i komanduar i PD-së, Enkelejd Alibeaj: Kjo është një shenjë tjetër në nivelin e ngritjes së përgjegjësisë. Me këtë lloj sensi përgjegjësie të kërkojmë bashkimin për të mirën e demokratëve, duke hequr dorë nga gjuha e urrejtjes. Është kjo gjuha që do përdorim ne, dhe ky është çelësi i moralit, me mirëkuptim të ecim para.

Besoj se tregon gjithçka qëndrimi i sotëm i grupit. Po është një hap i parë si shenjë drejt negociatës drejt tentativave të mira dhe të rëndësishme për të shkuar drejt bashkimit një grup pune i përbërë nga të gjitha instancat e partisë. Ju e keni parë dokumentin, jam ngarkuar unë për të përcaktuar emrat përkatës.

Pyetje: Tërhiqeni nga vendimi për Berishën?

Alibeaj: Është gjithçka e qartë si në vendimin e grupit parlamentar ashtu edhe në ato të ndërmarra nga kryesia.