Ka marrë fund misteri i vendndodhjes së ish-deputetit socialist Alqi Bllako, i cili zyrtarisht sipas drejtorisë së përgjithshme të policisë së shtetit është vetëdorëzuar gjatë ditës së djeshme.
Sipas policisë Bllako është vetëdorëzuar konform detyrimit ligjor për zbatimin e masës së sigurisë “Arrest në burg”, lëshuar dje nga Gjykata e Posaçme e Shkallës së Parë për Korrupsionin dhe Krimin e Organizuar.
Burime bëjnë me dije se vetëdorëzimi i Bllakos ka ndodhur në orët e para të mëngjesit të sotëm, në ndryshim nga ajo që u raportua dje në mesditë.
Njoftimi i policisë:
Drejtoria e Përgjithshme e Policisë së Shtetit, informon publikun se përkundër disa lajmeve të rreme mbi arratisjen e shtetasit Alqi Bllako, ky shtetas ndodhet në Drejtorinë Vendore të Policisë Tiranë që prej mbrëmjes së djeshme.
Sqarojmë se shtetasi Alqi Bllako është vetëdorëzuar konform detyrimit ligjor për zbatimin e masës së sigurisë “Arrest në burg”, lëshuar dje nga Gjykata e Posaçme e Shkallës së Parë për Korrupsionin dhe Krimin e Organizuar.
Kujtojmë se mbrëmjen e djeshme pati një sërë aludimesh se Bllako mund të ishte arratisur jashtë vendit, sa kohë që nga policia nuk kishte asnjë raportim zyrtar mbi vetëdorëzimin apo arrestimin e tij.
Fillimisht vetëdorëzimi i tij u raportua pak pas mesdite, edhe pse zyrtarisht informacioni nuk u konfirmua, më pas u tha se ish-deputeti mund të ishte arratisur, për të kulmuar te vetëdorëzimi i tij shumë orë më pas nga raportimet policore.
Bllako akuzohet për shpërdorim detyre dhe falsifikim dokumentesh në lidhje me procedurat e ndjekura për shpalljen e kompanisë fituese për inceneratorin e Fierit.
Në cilësinë e sekretarit të përgjithshëm të ministrisë së mjedisit, Bllako së bashku me eprorin e tij Lefter Koka, akuzohen për falsfikim dokumentesh duke favorizuar kompaninë e biznesmenit Klodian Zoto, ky i fundit ende në kërkim.
SPAK njoftoi 3 ditë më parë, se kishte sekuestruar një apartament me vlerë afro 15 milionë lekë të reja, në emër të babait të ish-deputetit, i cili dyshohet se ishte përfituar përmes korrupsionit.
3 ditë më parë, SPAK ekzekutoi 9 urdhër arrestet e lëshuara për hetimin që lidhet me inceneratorin e Fierit. Ndërkohë u lëshuan edhe 5 urdhër-arreste të reja për dosjen e inceneratorit të Elbasanit. Nga 9 urdhër arrestet, 7 ishin masa sigurie ‘arrest me burg’ dhe 2 në arrest shtëpie.
Lefter Koka, ish-ministri i Mjedisit, dhe Klodian Zoto, pronari i kompanisë që administron Inceneratorin e Fierit, kanë marrë masën e dytë ‘arrest me burg’, ndërkohë që 7 të tjerë akuzohen zyrtarisht nga Prokuroria për korrupsion dhe shpërdorim detyre.
Zoto vijon që të mbetet në kërkim, së bashku me Stela Gugallian.
