Ambasada amerikane në Tiranë i ka uruar fat të mbarë 28 kandidatëve të çertifikuar, që u kualifikuan në procesin e verifikimit të kushteve të sigurisë për “Hetues” në Byronë Kombëtare të Hetimit, dhe që tani do të fillojnë trajnimin.

Përmes një postimi në “Facebook”, ambasada e SHBA thekson se do të vazhdojë të mbështesë SPAK-un dhe të gjithë ata që i përgjigjen thirrjes së detyrës për të luftuar korrupsionin dhe krimin e organizuar.

Ndërkohë që Ambasada shton se së shpejti pret një tjetër thirrje nga BKH për rihapjen e garës për kandidatë, për të forcuar më tej këtë institucion.

“Urime dhe fat të mbarë burrave dhe grave që përfunduan me sukses procesin rigoroz të aplikimit dhe tani do të fillojnë trajnimin për Byronë Kombëtare të Hetimit. Shtetet e Bashkuara të Amerikës do të vazhdojnë të mbështesin SPAK-un dhe ata që i përgjigjen thirrjes së detyrës për të luftuar korrupsionin dhe krimin e organizuar në emër të popullit shqiptar. Presim së shpejti një thirrje tjetër për hetues të BKH-së, për të forcuar më tej këtë institucion të ri” !