Ambasadori i Britanisë në Shqipëri, Alastair King-Smith nga Teatri Kombëtar të Operas dhe Baletit në Tiranë, ka përcjellë një mesazh për të gjithë shqiptarët. Ai i ka bërë thirrje shqiptarëve që mos të shkojnë ilegalisht në Britani, por të shohin mundësit që i jep Shqipëria ose të udhëtojnë në rrugë të ligjshme.

King-Smith ndodhet aty sepse po festohet 100 vjetori i mardhënieve mes Shqipërisë dhe Mbretërisë së Bashkuar.

“Siç e keni dëgjuar në media kohët e fundit po përballemi me një sfidë të përbashkët, me një numër të shtuar shqiptarësh që po shkojnë në Britani në mënyrë të jashligjshme. Të dyja qeveritë tona po punojnë për t’i treguar njerëzve se ka alternativa, qoftë me mundësitë e lidhura në Shqipëri ose drejt udhëtimit në Britani në mënyrë të ligjshme.

Ne po investojmë bashkarisht në zonën e Kukësit dhe në pjesën veriore për të rritur mundësitë që njerëzit të punojnë dhe studiojnë këtu.

Unë përsëris apelin tim duke ju drejtuar të rinjve dhe familjarëve të tyre, të mos udhëtojnë në mënyrë të paligjshme. Ata rrezikojnë jetën dhe rrezikojnë të shfrytëzohen nga trafikantë kriminelë dhe po vënë në rrezik çdo mundësi për të udhëtuar në mënyrë të ligjshme jo vetëm në MB por edhe në shumë shtete të tjera.
Ne po punojmë që komuniteti shqiptar të marrë vlerësimin e duhur për kontributin e tij”-ka thënë ambasadori.