Autoriteti i Mbikëqyrjes Financiare (AMF) ka lansuar për konsultim publik një projektrregullore që synon zbatimin e ligjit të ri “Për Fondet e Pensionit Privat”. Kjo rregullore ka për qëllim të përcaktojë kërkesat mbi mjaftueshmërinë e kapitalit të shoqërisë administruese dhe të rregullojë format, llogaritjet dhe shumat e fondeve të pensionit privat.

Sipas projektrregullores, fondet minimale të shoqërisë administruese duhet të jenë të paktën 15.8 milionë lekë. Kërkesat ndryshojnë në varësi të vlerës së aktiveve në administrim, duke përcaktuar një rritje graduale të vlerës së fondeve të shoqërisë në rast se aktivet nën administrim shkojnë përtej 31.6 miliardë lekë.

Përveç kësaj, projektrregullorja përcakton që fondet e shoqërisë administruese nuk duhet të jenë më pak se 1/4 e shpenzimeve fikse të shoqërisë.

Ligji i ri për Fondet e Pensionit Privat ka sjellë rritje të lehtësive fiskale për kontributet në këto fonde, duke ndryshuar kufijtë dhe përmirësuar avantazhet tatimore për kontribuesit.