Partia e Lirisë nuk është e gatshme të japë 3 votat e saj pro amnistisë penale, duke ndjekur qëndrimin e pjesës tjetër të opozitës. Pas shtyrjes së votimit në parlament, Presidenti Ilir Meta ka komentuar për herë të parë këtë vendim, duke e cilësuar si një shenjë të zhbërjes së pazareve për amnistinë.

“Tërheqja nga rendi i ditës i projektligjit për amnistinë penale ishte dëshmi sesi kuvendi është marrë peng nga Rama, ku ligjet hiqen sipas axhendave të pazareve që bëhen apo zhbëhen.” – tha Meta.

Meta e quajti Kuvendin të zhytur në paligjshmëri dhe tha se ligji i zonave të mbrojtura, i kaluar vetëm me votat e PS, është një ligj për llogari të oligarkëve.

“Kuvendi kaos dhe paligjshmëri, që miraton ligje për llogari të oligarkëve. I tillë ishte miratimi i ligjit të kontestuar për masakrimin e zonave të mbrojtura, që rrezikojnë të kthehen në komplekse pallatesh e biznese që kanë qëllim pastrimin e parave.” – u shpreh Meta.

Projekti i ligjit për amnisti penal nuk mundi të kalonte në parlament të enjten, pasi e gjithë opozita kushtëzoi votën e saj, duke kërkuar faljen e të gjithë protestuesve, ndërsa Rithemelimi kushtëzoi votimin me plotësimin e kërkesave të tyre për bashkëkryetarin e reformës zgjedhore dhe komisionet.