Pas dy ditësh operacione, anija ushtarake italiane Libra është nisur sot drejt Shqipërisë me vetëm tetë persona në bord, dhe pritet të mbërrijë në Portin e Shëngjinit mëngjesin e 8 nëntorit, rreth orës 8:00. Sipas La Repubblica, fillimisht ishin selektuar nëntë persona, por një emigrant nga Bangladeshi u konsiderua shumë i moshuar dhe në gjendje jo të mirë shëndetësore për të përballuar udhëtimin.
Në përpjekje për të arritur objektivin e fillestar prej 60-70 emigrantësh për këtë operacion, u kryen “para-skanime” të qindra personave në anijet patrulluese dhe në Libra. Megjithatë, për shkak të kritereve të vendosura nga Ministria e Brendshme italiane, vetëm një numër i kufizuar mund të dërgohet në Shqipëri. Kapaciteti i anijes Libra është deri në dyqind persona, por për momentin vetëm tetë prej tyre janë nisur drejt Shqipërisë, ndërsa pjesa tjetër e emigrantëve do të kalojnë përmes procedurave të zakonshme të azilit në Itali.
Në mesin e 1,200 personave që arritën në Lampedusa brenda dy ditësh, tetë janë të ardhur nga vende të sigurta, ndaj dhe janë përzgjedhur për këtë transferim të veçantë. Ata pritet të udhëtojnë për të paktën 48 orë për të arritur në Shqipëri në një anije 80 metra të gjatë, ku ndodhen gjithashtu të paktën 70 anëtarë të ekuipazhit.
Kampi në Gjadër aktualisht është pa emigrantë, si pasojë e përplasjeve ligjore midis qeverisë italiane dhe gjykatave. Më 16 tetor, grupi i parë i emigrantëve që mbërriti në Shqipëri qëndroi vetëm tre ditë, pasi Gjykata e Romës urdhëroi kthimin e tyre në Itali, duke argumentuar se nuk vinin nga vende të sigurta. Për të shmangur ngërçin ligjor, kryeministrja italiane Giorgia Meloni nxori një dekret më 21 tetor, duke përditësuar listën e vendeve të sigurta dhe duke synuar lehtësimin e procesit të transferimit të emigrantëve në Shqipëri.
Ndërkohë, kampi në Gjadër është në pritje të mbërritjes së grupit të ri, duke përfshirë personelin përkthyes, pastrues, personel mjekësor, oficerë policie, si dhe karabinierë dhe policë financiarë, të cilët qëndrojnë në gatishmëri për të mirëpritur emigrantët azilkërkues.
