Policia Rrugore ka filluar të aplikojë gjoba edhe për këmbësorët që shkelin rregullat e qarkullimit rrugor, duke përfshirë këtu edhe shkeljen e vend-kalimit të vijave të bardha, që mund të çojë në aksidente. Specialisti i qarkullimit rrugor, Gerhard Baka, sqaron se çfarë ndodh kur një këmbësor kapet në shkelje.

Sipas tij, kur një agjent i Policisë Rrugore konstaton një këmbësor në parregullsi, merret masa administrative prej 1,000 lekësh. Në këtë moment, këmbësori i kërkohet të likuidojë masën dhe të vazhdojë rrugën e tij. Në lidhje me bllokimin e kartës së identitetit, Baka thotë se kjo bëhet në marrëveshje mes dy palëve.

“Kur një agjent konstaton një këmbësor në parregullsi, e ndal dhe i vihet në dukje shkelja, merret masa administrative prej 1000 lekësh. Qytetarit i kërkohet të likuidoje masën dhe të vazhdoje rrugën e lirë. Për mbajtjen e kartës, është marrëveshje mes dy palëve që deri kur të likuidojë gjobën të lërë kartën ose mund të shkojë në afërsi të postave të bëjë pagesën, të paraqesë mandatin dhe mund të vazhdojë,” shpjegon Baka.

Ky hap është pjesë e përpjekjeve për rritjen e sigurisë rrugore dhe për të sanksionuar shkelësit e rregullave të qarkullimit, përfshirë këtu edhe këmbësorët.