Arbana Osmani vazhdon të jetë një nga moderatoret më të pëlqyera nga publiku shqiptar, ndërsa rikthimi i saj në ekranin e madh pritet së shpejti. Burime pranë saj bëjnë me dije se Arbana po finalizon një projekt televiziv, një reality show që do të fokusohet te talentet e reja në fusha të ndryshme të artit. Ky format do të jetë ndryshe nga ajo që jemi mësuar të shohim në televizionet shqiptare, dhe Arbana pritet të jetë në rolin kryesor të moderatores.

Moderatorja ka paralajmëruar vetë se në shtator do të nisë sezoni i dytë i programit të saj të suksesshëm “Mirëmbrëma yje”. Përveç kësaj, ajo po punon edhe në një projekt krejt të ri, për të cilin ende nuk ka zbuluar detaje, por që do të transmetohet në kanalin e saj në YouTube.

Pak muaj më parë, Arbana u shfaq në skenën e “X Factor Albania” ku njoftoi ndryshimin e shtëpisë mediatike dhe rrugëtimin e ri në karrierë, duke konfirmuar largimin nga televizioni ku punoi për vite me radhë. Për detaje të mëtejshme mbi projektet e saj do të duhet të presim fillimin e sezonit të ri televiziv.