Analisti Arben Meçe ka shprehur mendimin se sulmet e Sali Berishës dhe Ilir Metës ndaj SPAK-ut janë rezultat i frikës së tyre se ky institucion mund t’i largojë përfundimisht nga politika shqiptare. Në një intervistë televizive, Meçe theksoi se SPAK është instrumenti ligjor që mund të bëjë të mundur nxjerrjen e individëve që kanë kryer krime në Shqipëri, duke përfshirë Berishën dhe Metën.
Sipas Meçes, Berisha është përgjegjës për ngjarje të rënda në historinë e vendit, siç është viti 1997, një periudhë me pasoja të rënda për Shqipërinë. Pavarësisht goditjeve nga populli, këto figura politike kanë arritur të qëndrojnë në pushtet për shkak të ndikimit të tyre në partitë politike.
Meçe argumenton se krijimi i SPAK-ut është pikërisht ai instrument që mund të largojë këta individë nga politika në mënyrë ligjore dhe përfundimtare. Ai përmendi ngjarjen e 21 janarit si një nga aktet më kriminale në Shqipëri dhe u shpreh se nuk është e pranueshme që një person që ka urdhëruar për të vrarë të vazhdojë të jetë pjesë e politikës.
“Goditja ligjore është goditja finale,” tha Meçe, duke theksuar se dënimi ligjor do të jetë një masë ekstreme që do të ndalojë hyrjen e këtyre individëve në politikë. Sipas tij, frika e Berishës dhe Metës qëndron në faktin se SPAK është ai që mund t’i largojë ata nga skena politike, dhe për këtë arsye ata kanë nisur një luftë kundër këtij institucioni, të cilin e shohin si asgjësuesin më të madh të tyre.
