Pas suksesit të shquar në UEFA Women’s Champions League, arbitrat shqiptare Emanuela Rusta, Erinda Kume dhe Koleta Prenga vazhdojnë të shkëlqejnë në arenën ndërkombëtare. Këtë herë, Emanuela Rusta, si arbitre kryesore, dhe Erinda Kume me Koleta Prengën, si asistente, kanë udhëhequr me sukses një ndeshje miqësore mes Italisë dhe Irlandës.

Ndeshja, e luajtur në stadiumin “Viola Park” të Firences, përfundoi me rezultatin 0-0 dhe arbitrat shqiptare u vlerësuan për performancën e tyre të shkëlqyer. Kjo është një tjetër arritje e rëndësishme për arbitrat shqiptare, duke theksuar cilësinë dhe profesionalizmin e tyre në skenën ndërkombëtare të futbollit.

Emanuela Rusta ka shënuar një tjetër moment të rëndësishëm në karrierën e saj, duke u bërë arbitra e parë femër e promovuar nga Komiteti i Arbitrave në UEFA në kategorinë e parë. Performancat e tyre pozitive po ndihmojnë në rritjen e prestigjit të futbollit shqiptar dhe pozicionimin e tij në skenën ndërkombëtare.