Kandidati i Partisë Socialiste në qarkun e Vlorës dhe drejtuesi i Arkivave, Ardit Bido, ka reaguar pas padisë për shpifje të ngritur ndaj tij nga Fredi Beleri.

Në një postim në rrjetet sociale, Bido thekson se Beleri ka qenë i “zhdukur” nga Tirana për rreth 1 vit e gjysmë dhe nuk është paraqitur në asnjë seancë gjyqësore, as për padinë që ka bërë ai ndaj tij dhe as për atë që vetë Beleri ka ngritur ndaj tij.

Bido shkruan:

“Sapo mori vesh se unë kandidoj për Partinë Socialiste në qarkun Vlorë, u shfaq papritur në Tiranë për të bërë shoë-n e radhës. Ne do të shihemi në gjyq dhe është mëse e sigurt që ai do ta humbasë dhe do të dënohet për shpifje. E vërteta nuk lidhet me fushatat elektorale – e vërteta është e tillë, sepse është!”

Ai thekson se do të vazhdojë të mbajë qëndrimet e tij të bazuara në të vërtetën, ndërsa mbyll mesazhin e tij me fjalët:

“Unë jam Ardit Bido. Kam pasur qëndrimet e mia, kam qëndrimet e mia dhe do të kem gjithmonë qëndrime të lidhura me të vërtetën. Mirupafshim, Fredi!”