Zona e bregut të Matës në Lezhë po përballet me një situatë të rëndë emergjente, pas çarjes së argjinaturës së lagunës së Vainit, e cila ka sjellë përmbytjen e qindra hektarëve tokë bujqësore dhe ka rrethuar dhjetëra banesa në Mylte, Barbulloje, Spiten dhe Tresh.

Deputeti i Partisë Demokratike, Gjin Gjoni, inspektoi nga afër zonën e prekur, ku dëgjoi shqetësimet e banorëve dhe pa dëmet e konsiderueshme në bujqësi dhe blegtori. Sipas tij, dhjetëra familje që sigurojnë jetesën nga puna e tokës janë në gjendje të vështirë, ndërsa niveli i ujit vijon të rritet duke e rënduar më tej situatën.

Gjoni i bëri thirrje institucioneve që të ndërhyjnë pa vonesë, duke theksuar nevojën e një mbështetjeje të dyfishtë: emergjente për menaxhimin e dëmeve aktuale dhe afatgjatë për investime serioze në sistemin e kullimit. Ai u shpreh se kjo situatë ishte paralajmëruar prej kohësh, por ka munguar vëmendja e pushtetit vendor dhe atij qendror.

“Është koha që këto problematika të trajtohen me seriozitet dhe përgjegjësi, në mënyrë që banorët të mos përballen më me të njëjtat drama,” deklaroi deputeti Gjoni.