Bellinzona ka zyrtarizuar afrimin e sulmuesit shqiptar Armando Sadiku për sezonin e ri, duke rikthyer në Zvicër një nga emrat më të njohur të futbollit shqiptar.
34-vjeçari kthehet aty ku nisi aventurën e tij jashtë Shqipërisë në vitin 2011, fillimisht te Locarno e më pas te Lugano, përpara transferimit te Zurihu në janar 2014.
Pas eksperiencës së parë në futbollin zviceran, karriera e Sadikut vijoi në Poloni, Spanjë, Turqi, Bolivi dhe së fundmi në Indi, megjithëse gjatë viteve ka pasur dy rikthime të përkohshme edhe te Lugano.
Statistikat e tij në Zvicër janë mbresëlënëse: 42 ndeshje dhe 30 gola me Locarnon, 79 paraqitje dhe 41 gola me Luganon, si dhe 90 ndeshje e 29 gola në Super League dhe 95 paraqitje me 58 gola në Challenge League, duke përfaqësuar edhe Vaduzin.
Përveç kampionatit zviceran, Sadiku ka përvojë edhe në La Liga spanjolle (6 ndeshje), Europa League (3 ndeshje) dhe Copa Libertadores (3 ndeshje). Ai është autor i 12 golave në 38 ndeshje me Kombëtaren shqiptare, pjesë e skuadrës historike në Euro 2016.
Me këtë transferim, Bellinzona synon të përfitojë nga eksperienca dhe instinkti i tij për gol për të arritur objektivat e sezonit.
