Banorët e Gazës kanë kaluar natën e parë pa bombardime, pas hyrjes në fuqi të marrëveshjes së armëpushimit dhe shkëmbimit të të burgosurve midis Izraelit dhe Hamasit. Ky është momenti i parë i qetësisë që prej 7 tetorit 2023, kur shpërtheu konflikti.

Në orën 11:15 të mëngjesit me orën lokale, sulmet ajrore dhe bombardimet izraelite u ndalën, duke i dhënë fund 471 ditëve të tmerrit. Për herë të parë pas më shumë se 15 muajsh, fëmijët e Gazës mundën të flinin pa frikën e shpërthimeve, një fakt që u reflektua edhe në rrjetet sociale nga qytetarët palestinezë.

Momente shprese për popullin palestinez

Një qytetar nga Gaza, Yusuf Hamada, shkroi në rrjetet sociale:
“Nata e parë që fëmijët e Gazës fjetën pa frikë apo bombardime. Falënderimet i takojnë Zotit.”

Ndërkohë, spitalet dhe morgjet, që për muaj të tërë kanë qenë të mbushura me viktima të luftës, sot janë përjetuar ndryshe. Gazetari Abu Bakr Abid ndau një moment prekës nga spitali Aksa, duke deklaruar:
“Për herë të parë që nga 7 tetori, morgu i këtij spitali është i mbyllur me kyç. Jam në lot. Nuk ka më humbje jetësh, nuk ka kufoma, nuk ka më gjak të spërkatur në tokë. Kjo është hera e parë që nuk shohim skena të tilla të tmerrshme.”

Bilanci tragjik i luftës

Gjatë këtij konflikti, janë vrarë 46,913 palestinezë, përfshirë 17,841 fëmijë dhe 12,298 gra. Për muaj të tërë, familjet palestineze janë përballur me humbje, shkatërrim dhe dhimbje, duke pritur trupat e të dashurve të tyre nëpër spitalet e mbingarkuara.

Sot, Gaza zgjohet ndryshe. Armëpushimi ka sjellë një rreze shprese për popullin palestinez, ndërsa bota pret të shohë nëse kjo qetësi do të jetë e përhershme apo vetëm e përkohshme.