Një nga emrat më të njohur të krimit të organizuar, Xhevdet Plaku, 44 vjeç, ka arritur të arratiset nga burgu i Barcaglione, Ankona, Itali. Plaku, i njohur si drejtues i një grupi kriminal ndërkombëtar droge, po vuante një dënim për trafik narkotikësh dhe akuzohet gjithashtu për dy vrasje të kryera në vitet 2000 dhe 2004.

Arratisje e planifikuar me perpikmeri

Mëngjesin e së enjtes, rreth orës 8:30, Plaku ka shfrytëzuar mundësinë e punës jashtë qelive, bazuar në nenin 21 të Kodit të Burgjeve. Gjatë një rutine të zakonshme për të zbrazur koshat e plehrave, ai ka humbur gjurmët. Kontrolli rutinë i orës 11:30 konfirmoi mungesën e tij, duke shkaktuar alarmin. Policia italiane po kërkon intensivisht në fusha, pyje dhe objekte të braktisura pranë burgut, por deri më tani nuk ka asnjë gjurmë të tij.

Dosja e te kaluares kriminale

Xhevdet Plaku akuzohet për dy vrasje. E para në vitin 2000 në Savona, Itali, ku vrau bashkatdhetarin Sali Rapi me një plumb në kokë si pjesë e një konflikti mes bandash. E dyta ndodhi në vitin 2004 në Durrës, ku ekzekutoi Saimir Sinë si hakmarrje pas trafikimit të të dashurës së tij në Itali. Pavarësisht dënimit fillestar, Plaku u lirua për mungesë provash dhe vijoi aktivitetin kriminal jashtë vendit.

Perandoria e droges

Në Itali, Plaku ngriti një grup kriminal me bazë në Amsterdam, duke trafikuar drogë nga Holanda dhe Belgjika. Ai përdorte 25 identitete të ndryshme për të shmangur kapjen. Organizata e tij ishte e njohur për shpërndarjen e drogës me cilësi të dallueshme, duke e emërtuar sipas markave të njohura si “Hermes”, “Lacoste” dhe “Playboy”.

Atentatet

SPAK ka zbuluar se Plaku ka qënë në shënjestër të katër atentateve të dështuara të porositura nga Rexhep Rapi, i njohur si “i forti i Sukthit”, për hakmarrje. Të gjitha atentatet, dy herë në Durrës dhe një herë në Tiranë, kanë dështuar.

Policia italiane dhe autoritetet ndërkombëtare janë në gatishmëri të lartë për kapjen e tij. Arratisja e Plakut përforcon imazhin e tij si një nga kriminelët më të rrezikshëm dhe strategjikë në botën e krimit të organizuar.

Autoritetet vijojnë hetimet dhe apelon për çdo informacion që mund të ndihmojë në lokalizimin e tij.