39-vjeçari shqiptar, Armiol Rrasa, është lënë në paraburgim nga autoritetet greke pasi u arrestua së bashku me partneren e tij ditë më parë, pasi në makinën e tyre u gjet municion luftarak. Sipas mediave greke, partnerja e tij është lënë e lirë me kushtin që të paraqitet një herë në muaj në komisariat.

Gjatë dëshmisë së tij, Armiol Rrasa ka pretenduar se pistoletën dhe plumbat i mbante për t’u mbrojtur për shkak të një hakmarrjeje të vjetër. Ai pohoi gjithashtu se nuk kishte dijeni për eksplozivin në makinë, duke thënë se ai i përkiste një personi tjetër. Partnerja e tij deklaroi se armën dhe lëndën plasëse i kishte parë për herë të parë kur i gjeti policia.

Armiol Rrasa, i lindur në vitin 1985, ka një të kaluar kriminale të rëndë. Ai u dënua me burgim të përjetshëm në vitin 2008 për akuzën e drogës, por u lirua në vitin 2015. Arrestimi i tij ndodhi pas një kontrolli të rastësishëm nga policia, e cila zbuloi një çantë blu që përmbante lëndë plasëse, detonatorë dhe një pistoletë tip Tokarev.

Incidenti ndodhi në rrugët e Greqisë, ku 39-vjeçari u arrestua teksa qëndronte ulur në trotuar.