Dy persona janë arrestuar pas dyshimeve për mashtrim me sigurimin e makinës, me qëllim përfitimin e dëmshpërblimit të padrejtë nga një kompani sigurimesh. Ata janë identifikuar si Armando Kallmeti, 22 vjeç, banues në Nikël, dhe Igli Topalli, 25 vjeç, banues në Tapizë.

Ngjarja ka ndodhur më datë 4 tetor 2024, rreth orës 14:00, në aksin rrugor “Valias-Tiranë”, ku Armando Kallmeti, duke drejtuar një automjet tip “Benz”, ka humbur kontrollin dhe ka dalë nga rruga. Pas kësaj, për të përfituar dëmshpërblim të padrejtë nga kompania e sigurimeve, Kallmeti ka inskenuar një përplasje të automjetit të tij me një tjetër automjet, tip “Volkswagen Golf”, që drejtohej nga Igli Topalli. Ata kanë paraqitur informacione të rreme për automjetin që kishte sigurim, për të arritur qëllimin e tyre.

Ata akuzohen për “Mashtrim në sigurime” dhe “Veprime që pengojnë zbulimin e së vërtetës”, vepra penale të kryera në bashkëpunim, të parashikuara në nenet 145 dhe 301/25 të Kodit Penal.