Në një operacion të koduar “Tempulli 2”, policia në Vaun e Dejës ka kapur dy persona pasi u gjetën me një sasi të konsiderueshme të drogës. Shtetasit F. M., 26 vjeç dhe K. K., 37 vjeç u arrestuan pasi u zbulua se posedonin 1000 fara canabisi dhe sasi kokaine të gati për shitje.

Kontrollet policore u bënë në automjetin e tyre dhe rezultoi se ata kishin me vete lëndët narkotike. Pas veprimeve procedurale, shtetasit u transferuan te Prokuroria pranë Gjykatës së Shkallës së Parë të Juridiksionit të Përgjithshëm Shkodër për hetime të mëtejshme.

Njoftimi i policisë:

Në vijim të kontrolleve të bazuara në inteligjencën policore dhe të kryera në kuadër të megaoperacionit antidrogë të koduar “Tempulli 2”, specialistët për Hetimin e Krimeve të Komisariatit të Policisë Vau i Dejës, në fshatin Kryebushat, i kanë bërë shenjë ndalimi automjetit tip “Opel”, me drejtues shtetasin F. M. dhe pasagjer shtetasin K. K.

Nga kontrollet fizike ndaj 2 shtetasve dhe në automjet, shërbimet e Policisë gjetën një pako me 1000 fara cannabisi dhe një sasi lënde narkotike kokainë, të ndarë në doza, që posedoheshin nga këta shtetas, me qëllim shitjen.

Në përfundim të veprimeve procedurale u arrestuan në flagrancë shtetasit F. M., 26 vjeç, banues në fshatin Bogë dhe K. K., 37 vjeç, banues në Shkodër.

Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Shkodër, për veprime të mëtejshme.