Policia e Durrësit ka njoftuar arrestimin e dy personave, të cilët dyshohet se iu merrnin para qytetarëve për të parkuar makinat në hapësira publike të përcaktuara nga Bashkia si vendparkime pa pagesë.

“Shtetasit A. M., 32 vjeç dhe M. G., 34 vjeç, të dy banues në Durrës, janë vënë në pranga pasi iu merrnin para qytetarëve për të parkuar automjetet në një hapësirë të përcaktuar nga Bashkia e Durrësit si vendparkim pa pagesë,” njofton policia.

Në njoftim thuhet: “Durrës/Iu merrnin para qytetarëve që parkonin automjetet në një hapësirë publike të përcaktuar nga bashkia si vendparkim pa pagesë, arrestohen 2 shtetas. Si rezultat i kontrolleve të vazhdueshme që kryejnë specialistët për Hetimin e Krimeve Ekonomike dhe Financiare të DVP Durrës, në subjekte të ndryshme ekonomike, është goditur një tjetër rast i përfitimit në mënyrë të paligjshme të pagesave për parkimin e automjeteve në hapësira publike.”

Materialet procedurale për këtë rast janë dorëzuar Prokurorisë pranë Gjykatës së Shkallës së Parë të Juridiksionit të Përgjithshëm Durrës për veprime të mëtejshme.