Një çift të rinjsh janë arrestuar nga Policia e Durrësit, pasi dyshohet se janë autorë të grabitjes së një taksisti. Ata akuzohen se kanë kërcënuar drejtuesin e taksisë me një thikë dhe më pas i kanë marrë një shumë parash.

Të arrestuarit janë:

– A. B., 26 vjeç, banues në Durrës
– V. B., 29 vjeçe, banuese në Kavajë

Sipas hetimeve, rreth orës 01:00 në lagjen Nr.13, në rrethrrotullimin “ILIRIA” në plazh, të dy këta individë hipën në automjetin e taksistit, shtetasin I. K. Në momentin që hipën në makinë, A.B. dyshohet se ka kërcënuar taksistin me një thikë, ndërsa V.B. ka marrë një shumë parash që taksisti kishte në makinë dhe janë larguar.

Njoftimi nga Policia thekson se, falë reagimit të shpejtë të forcave të rendit, u identifikuan dhe u arrestuan autorët e dyshuar. Materialet i kaluan Prokurorisë pranë Gjykatës së Shkallës së Parë të Juridiksionit të Përgjithshëm Durrës për veprime të mëtejshme.