Dy shqiptarë dhe dy grekë janë arrestuar nga policia greke pas sekuestrimit të 210 kg kokainë në Portin e Pireut në Greqi. Kreu i organizatës ishte shqiptari me tre emra, Jasona Mërkuri (Andrea, Azdren Muharremi), i cili kujdesej për gjetjen e sasive të trafikuara të drogës, financimin e blerjes dhe transportit, dhe organizimin e dërgesës nga Panamaja drejt vendeve evropiane.

Ortaku i tij ishte Marsel Stafaj, 36 vjeç, gjithashtu nga Shqipëria, i cili merrej me gjetjen dhe rekrutimin e partnerëve në Greqi për importimin dhe marrjen e drogës dhe trafikimin e mëtejshëm të saj. Anëtarë të grupit ishin edhe dy grekë. Njëri prej tyre ishte përgjegjës për komunikimin me anëtarët e tjerë të organizatës kriminale me qendër jashtë vendit, duke i përfaqësuar ata për koordinimin e furnizimit dhe financimit të blerjes së sasive të drogës që do të trafikohej. Tjetri siguroi mbulimin operacional dhe mbrojtjen e ‘kreut të bandës’ duke marrë masat e duhura kundërmbrojtjeje për të shmangur kapjen e tij.

Në të njëjtën kohë, disa anëtarë të organizatës janë ende të paidentifikuar. Ata veprojnë jashtë Greqisë, të ngarkuar me furnizimin, blerjen, vendosjen dhe fshehjen e drogës brenda kontejnerëve të ngarkuar me ngarkesë të ligjshme (kontejnerë), të ardhur nga Panamaja dhe me destinacion Greqinë, për trafikim të mëtejshëm. Gjithashtu, grupi ka edhe anëtarë me bazë në Greqi, të cilët ende nuk janë identifikuar, përgjegjës për trafikun e mëtejshëm të sasisë së sekuestruar.