Një operacion i policisë në Tiranë ka çuar në arrestimin e një 37-vjeçari, Aurel Lazaj, i cili u kap me armë zjarri në një lokal. Burime zyrtare nga policia bënë të ditur se pas një ndjekjeje të shpejtë, Lazaj është futur në pranga dhe do të përballet me drejtësinë për posedim të paligjshëm të armës.
Ngjarja ka ndodhur në një lokal në Tiranë, ku forcat e policisë kanë intervenuar pas një raportimi. Arrestimi i Aurel Lazaj ka ndodhur me sukses, dhe autoritetet tashmë janë duke hetuar për të zbuluar më shumë rreth rastit dhe motivacionit të mundshëm të kapjes së tij me armë zjarri.
Njoftimi i policisë:
Vijon operacioni policor i koduar “Sundimi i ligjit”, për kapjen e shtetasve të shpallur në kërkim dhe të atyre që posedojnë armë zjarri, pa leje. Në kuadër të këtij operacioni, nga Sektori për Hetimin e Narkotikëve në DVP Tiranë u finalizua operacioni policor i koduar “Befasia”.
U kap në flagrancë me armë zjarri pistoletë me municion luftarak, në lokal, vihet në pranga 37-vjeçari. Sekuestrohen arma e zjarrit pistoletë dhe municioni luftarak. Shërbimet e Sektorit për Hetimin e Narkotikëve të DVP Tiranë, në vijim të punës për parandalimin dhe goditjen e veprimtarisë kriminale në fushën e armëmbajtjes pa leje, bazuar dhe në informacionet e siguruara në rrugë operative se në një lokal në rrugën “Him Kolli”, ndodhej një shtetas i armatosur, kanë organizuar dhe finalizuar operacionin policor të koduar “Befasia”, për kapjen e tij.
Gjatë operacionit, shërbimet e Policisë kanë ndërhyrë në lokalin ku po qëndronte shtetasi Aurel Lazaj, të cilit gjatë kontrollit fizik i gjetën një armë zjarri pistoletë me municion luftarak. Në vijim të veprimeve procedurale u arrestua në flagrancë shtetasi Aurel Lazaj, 37 vjeç, banues në Tiranë, për veprën penale “Mbajtja pa leje dhe prodhimi i armëve, armëve luftarake dhe i municionit”. Arma e zjarrit dhe municioni luftarak u sekuestruan në cilësinë e provës materiale. Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Tiranë, për veprime të mëtejshme.
