Korçë, 6 qershor 2025 – Shërbimet e Policisë Kufitare në pikën e kalimit kufitar Qafë Thanë kanë arrestuar në flagrancë një 38-vjeçar, i cili tentoi të kalonte në mënyrë të paligjshme një sasi nafte kontrabandë.

Shtetasi E. Q., banues në Elbasan, përballet me akuzën për veprën penale “Kontrabandë me mallra që paguhet akcizë”, njofton Policia.

Pas kontrollit të kryer, Policia sekuestroi sasinë e naftës në cilësinë e provës materiale. Specialistët për Hetimin e Krimeve të Drejtorisë Vendore të Kufirit dhe Migracionit Korçë referuan materialet në Prokurorinë e Korçës për veprime të mëtejshme ligjore.

Në njoftimin zyrtar të Policisë bëhet me dije se kontrollet intensive vijojnë, bazuar në analizën e riskut, me qëllim parandalimin dhe goditjen e paligjshmërisë në zonën kufitare.