Policia e Tiranës ka arrestuar një shtetase turke 40-vjeçare, e cila dyshohet se rekrutonte vajza nga Turqia dhe Azerbajxhani dhe i shfrytëzonte për prostitucion. Operacioni, i koduar “Escort”, u zhvillua dy javë më parë, dhe në të janë përfshirë specialistët e Seksionit për Hetimin e Trafiqeve të Paligjshme dhe Komisariati i Policisë Rinas.

Shtetasja G. Ç., në bashkëpunim me A. H., e arrestuar gjithashtu, dyshohet se përdorte një faqe online për të rekrutuar shtetase të huaja dhe i shfrytëzonte ato për prostitucion. Gjatë kontrollit fizik, u gjetën bizhuteri floriri dhe një shumë prej rreth 3000 eurosh, të dyshuara të përfituara nga veprimtaritë e kundërligjshme.

Policia ka referuar materialet në Prokurorinë e Tiranës për veprime të mëtejshme, ndërkohë që hetimet vijojnë për dy shtetase të tjera turke të dyshuara për ushtrim prostitucioni.