Në kuadër të operacionit të koduar “Sundimi i Ligjit”, policia e Durrësit ka arrestuar 47-vjeçarin Dodë Rica, pronar i një lokali nate në Prishtinë, i cili akuzohet për trafikim personash. Rica, i lindur në Mirditë, ishte shpallur në kërkim ndërkombëtar nga autoritetet kosovare për veprën penale të trafikimit të personave.

Gjykata Themelore e Prishtinës ka caktuar ndaj tij masën e sigurisë “Arrest në burg” për akuzat e ngritura. Interpol Tirana po bashkëpunon me agjencitë ligjzbatuese në Kosovë për të finalizuar procesin e ekstradimit të Dodë Ricës.

Operacioni ka rezultuar nga informacione të siguruara nga inteligjenca policore dhe shkëmbimet ndërmjet Interpol Tiranës dhe agjencive ligjzbatuese në Kosovë. Forca e Posaçme Operacionale dhe Seksioni Kundër Trafiqeve të DVP Durrës kapën Ricën në lagjen nr. 13 të qytetit dhe e vunë në pranga me qëllim ekstradimin e tij në Kosovë.