Policia ka arrestuar shtetasin, Muharrem Brahimaj në Mallakstër të Fierit, pasi kishte mbjellë bimë kanabis përreth oborrit të shtëpisë së tij.

Gjatë kontrollit brenda shtëpisë së 57 vjeçarit, policia ka gjetur gjithashtu edhe doza të lëndëve narkotike kanabis të cilat ishin gati për shpërndarje.

Njoftimi i Plotë:

Mallakastër/Goditet një rast i kultivimit të bimëve narkotike, vihet në pranga 1 shtetas. Gjatë kontrollit në banesën e tij, u gjetën dhe u sekuestruan edhe doza me lëndë të dyshuar narkotike cannabis sativa.

Në vijim të punës për evidentimin dhe goditjen e rasteve të tentativës për kultivim të bimëve narkotike, bazuar në informacionet e marra në rrugë policore, specialistët për Hetimin e Krimeve në Komisariatin e Policisë Mallakastër, në bashkëpunim me specialistët për Hetimin e Narkotikëve në DVP Fier, arrestuan në flagrancë shtetasin Muharrem Brahimaj, 57 vjeç, banues në Kash, Mallakastër, pasi gjatë kontrollit përreth banesës së tij, janë gjetur të kultivuara bimë të dyshuara narkotike cannabis sativa. Gjithashtu, gjatë kontrollit në banesë u gjetën dhe u sekuestruan doza me lëndë të dyshuar narkotike kanabis.