Një 66-vjeçar i shpallur në kërkim tre ditë më parë është arrestuar dhe ndodhet në pranga pasi policia e gjeti në oborrin e banesës së tij një sasi të madhe kanabisi. Në operacionin e zhvilluar në kuadër të megaoperacionit kombëtar “Territor i pastër”, u sekuestruan 8 kg e 256 gramë kanabis në formë boçeje.

Shtetasi i arrestuar është identifikuar si N. Q., i cili u lokalizua dhe u kap nga specialistët e Sektorit për Hetimin e Narkotikëve të DVP Shkodër. Gjatë kontrollit të kryer në fshatin Kasnec, në oborrin e banesës së tij dhe në afërsi të saj, u gjetën 8.256 kg lëndë e dyshuar narkotike, e cila u sekuestrua në cilësinë e provës materiale.

Pjesë e operacionit është dhe kërkimi i djalit të 66-vjeçarit, një 17-vjeçar, i dyshuar për përfshirje në këtë aktivitet kriminal. Policia vazhdon hetimet për të kapur të riun dhe për të zbuluar më shumë detaje mbi aktivitetin e dyshuar dhe rrjetin e mundshëm të shpërndarjes së drogës.

Njoftimi i Policisë

Në njoftimin e policisë thuhet:

“Për zbatimin e planit të masave të hartuar në kuadër të megaoperacionit kombëtar ‘Territor i pastër’, për goditjen e veprimtarisë kriminale të kultivimit të bimëve narkotike, identifikimin dhe kapjen e autorëve, specialistët e Sektorit për Hetimin e Narkotikëve të DVP Shkodër, bazuar në informacionet e siguruara nga inteligjenca policore, lokalizuan, kapën dhe vunë në pranga shtetasin N. Q., 66 vjeç. Ky shtetas ishte shpallur në kërkim pasi gjatë kontrollit të territorit të kryer në kuadër të megaoperacionit ‘Territor i pastër’, në fshatin Kasnec, në oborrin e banesës së këtij shtetasi dhe në afërsi të banesës, u gjetën 8.256 kg lëndë e dyshuar narkotike cannabis sativa në formë boçeje, e cila u sekuestrua në cilësinë e provës materiale.”

Materialet procedurale i kaluan Prokurorisë së Shkodrës për veprime të mëtejshme. Policia vazhdon punën për kapjen e 17-vjeçarit dhe për hetimin e të gjitha aspekteve të veprimtarise kriminale.