Një 37-vjeçar, i identifikuar si A.Z., është arrestuar nga Policia e Tiranës, pasi akuzohet se organizonte lojëra fati në lokalin që administronte në rrugën “Kole Koçi”.

Sipas njoftimit zyrtar të Policisë, A.Z. u kap në flagrancë duke përdorur celularin e tij për të zhvilluar aktivitetin e paligjshëm. “U arrestua në flagrancë shtetasi A.Z., 37 vjeç, pasi në lokalin që ai administronte organizoheshin lojëra fati. Në cilësinë e provës materiale u sekuestrua një celular që përdorej për këtë veprimtari të paligjshme,” thuhet në komunikatën e uniformave blu.

Materialet procedurale janë dorëzuar në Prokurorinë e Tiranës për veprime të mëtejshme ligjore. Ky rast vjen si pjesë e kontrolleve të vazhdueshme të Policisë për parandalimin e aktiviteteve të kundraligjshme në kryeqytet.