Autoritetet italiane kanë konfirmuar arrestimin e autorit të dyshuar për vrasjen e Kevin Muharremi, i cili u qëllua për vdekje në orët e para të mëngjesit në Montecalvoli, në provincën e Pizës.

Sipas hetimeve, autori është një 20-vjeçar shqiptar, i ndaluar në autostradë duke udhëtuar drejt Romës. Identifikimi i tij u mundësua nga kamerat e sigurisë dhe targat e automjetit Range Rover gri me të cilin lëvizte.

Ngjarja ndodhi pasi 25-vjeçari po kthehej nga një klub nate në Valdera ku kishte pasur një sherr, bashkë me një mik dhe një kushëri në makinë. Ai ndodhej në sediljen e pasagjerit kur u qëllua disa herë nga një automjet tjetër, duke humbur jetën në vendngjarje.

Hetuesit po shqyrtojnë nëse incidenti në klubin e natës lidhet me vrasjen, ndërsa raportimet tregojnë se viktima dhe autori mund të njiheshin më parë. Kevin Muharremi punonte në një lavazh makinash në Fucecchio, ku edhe jetonte.

Ky rast ka tronditur komunitetin shqiptar dhe lokal në zonën e Valderës, ndërsa hetimet vazhdojnë për të përcaktuar motivet dhe rrethanat e plota të ngjarjes.