Policia ka arrestuar Gabriele Peqinin, të riun që akuzohet për plagosjen me armë zjarri të Daniel Bushit më 2 dhjetor 2022 në Durrës. Arrestimi është realizuar pas një operacioni të koduar “Flagranca”, i realizuar nga Komisariati i Policisë Nr. 6 në bashkëpunim me Seksionin e Forcës së Posaçme të Operacioneve Speciale dhe Sektorin për Hetimin e Narkotikëve në DVP Tiranë.

Njoftimi i policisë tregon se Gabriele Peqini, i shpallur në kërkim për tentativë vrasje, është kapur në një operacion që kishte për qëllim lokalizimin dhe kapjen e personave me rrezikshmëri të lartë shoqërore. Ai është arrestuar ndërkohë që qarkullonte i armatosur dhe kishte në posedim mjete identifikimi të dyshuara si të falsifikuara dhe lëndë të dyshuar narkotike.

Operacioni policor “Flagranca” ka pasur si qëllim kapjen dhe vënien përpara përgjegjësisë penale të individëve të shpallur në kërkim për krime të ndryshme. Peqini është një person me rekorde të shumta kriminale dhe rrezikshmëri të lartë shoqërore.