Një 41-vjeçar, Alban Rrodhe, i shpallur në kërkim nga Gjykata e Posaçme për Krimin e Organizuar (GjKKO) për veprën penale “Shkelje e barazisë së pjesëmarrjes në tendera apo ankande publike” e kryer në bashkëpunim, është arrestuar në Gramsh. Ai është dënuar nga GjKKO me 6 muaj burgim për akuzat e ngritura ndaj tij.

Në njoftimin e policisë, bëhet e ditur se, “në vijim të punës për kapjen e shtetasve të shpallur në kërkim për veprimtari kriminale të ndryshme, shërbimet e Komisariatit të Policisë Gramsh, të mbështetura nga inteligjenca policore, bënë të mundur kapjen e shtetasit në kërkim dhe ekzekutuan urdhrin e Prokurorit të Prokurorisë së Posaçme Kundër Korrupsionit dhe Krimit të Organizuar Tiranë.”

Materialet e çështjes i kaluan Prokurorisë së Posaçme Kundër Korrupsionit dhe Krimit të Organizuar për veprime të mëtejshme. Gjykata e Posaçme e Shkallës së Parë për Korrupsionin dhe Krimin e Organizuar i dha vendimet për Alban Rrodhen dhe nëntë ish-zyrtarë të bashkisë së Gramshit më 12 tetor 2023. Të gjithë të pandehurit pranuan fajin, duke përfituar nga gjykimi i shkurtuar, që u ul dënimin me një të tretën.