Specialistët e Seksionit për Hetimin e Narkotikëve, në bashkëpunim me Forcat Kombëtare të Sigurisë (FKS) dhe shërbimet e mbështetjes operacionale, kanë goditur një tjetër rast të veprimtarisë kriminale në fushën e narkotikëve, si pjesë e një operacioni të mirëorganizuar në zonën e Lezhës.

Gjatë këtij aksioni, shërbimet e Policisë kanë ndaluar për kontroll një automjet tip BMW, me drejtues shtetasin K. P. dhe pasagjer shtetasin Elis Prenga. Gjatë kontrollit fizik të ushtruar ndaj Prengës, janë gjetur dhe sekuestruar një sasi lënde narkotike, e dyshuar si kokainë, si dhe një shumë e konsiderueshme parash, për të cilën dyshohet se është përfituar nga shitja në doza e lëndës narkotike.

Në cilësinë e provës materiale, u sekuestruan:
• Lënda narkotike (kokainë),
• Shuma e parave në cash,
• Automjeti tip BMW,
• Një aparat celular i përdorur për komunikimet lidhur me aktivitetin kriminal.

Në përfundim të veprimeve procedurale, është arrestuar në flagrancë shtetasi E. P., 38 vjeç, banues në Laç, për veprën penale “Prodhimi dhe shitja e lëndëve narkotike”, parashikuar nga neni 283 i Kodit Penal.

Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Lezhë, për hetime të mëtejshme. Autoritetet vijojnë hetimet për zbardhjen e plotë të aktivitetit kriminal dhe identifikimin e bashkëpunëtorëve të mundshëm.